ကလေးတစ်ယောက်လို မျက်လုံးများ ရှိသူရဲ့ မသိနားမလည်ခြင်းများ

ကလေးတစ်ယောက်လို မျက်လုံးများ ရှိသူရဲ့ မသိနားမလည်ခြင်းများ
by Aung Yin Nyein on Monday, September 19, 2011 at 2:06am ·
အောင်ရင်ငြိမ်း
၁၅ စက်တင်ဘာ ၂၀၁၁
ပေဖူးလွှာ မဂ္ဂဇင်း၊ ဇန်န၀ါရီ၊ ၂၀၁၂

            ###

            ကိုယ့်မှာ လူတွေကို ရှော့ခ်ရိုက်စေတဲ့ အတွေးအခေါ်တွေ ရှိတယ်။
            အစိုးရမူဝါဒတစ်ခုခုကို ရုပ်လုံးဖော်အသက်သွင်းဖို့် ရည်ရွယ်တည်ဆောက်ထားတဲ့ ၀ါကျအများစုက အပေါစားစာသားတွေပဲ။ အနုပညာဟာ လူတိုင်းနဲ့ မထိုက်တန်။ ကဗျာဆိုတာလည်း ကလေးလူကြီး အသက်အရွယ်မရွေး စားသုံးမှီဝဲလို့ရနိုင်တဲ့ ပဋိဇီဝဆေးဝါးမျိုးတော့ မဟုတ်ဘူးပေါ့။
            ခင်ဗျား အခုတလော စကားအပြောအဆို တဖြည်းဖြည်း နည်းသွားတယ်လို့  မှတ်ချက်ချတဲ့ ဘော်ဒါတစ်ယောက်ကို ပြန်ပြောဖို့ ကိုယ့်မှာ စကားလုံး အဆင်သင့် မရှိ။ ကျေးဇူးပြုပြီး ကိုယ့် အသိဥာဏ်နဲ့ နှလုံးသားဆီ ရောက်အောင် မင်း အသိအမြင်နဲ့ ထွင်းဖောက်တိုးဝင် ကြည့်လိုက်စမ်းပါ။
             ဒီမှာ အခု ကိုယ်ဝတ်ထားတဲ့ တီရှပ်ရဲ့ နောက်ကျောတံဆိပ်က Nihilist. လူ့အဖြစ်မှာ ချစ်ခြင်းမေတ္တာနဲ့ ဥာဏ်ပညာကလွဲပြီး ဘာကိုမှ အယုံအကြည်မရှိတော့လို့ ဘာကိုမှ မတွေးခေါ်ဘဲ ဒီအတိုင်း လက်ပိုက်ရပ်နေတယ်။ ကဗျာဆရာတစ်ယောက် အတွေးအခေါ်တွေကို ရပ်တန့်ထားတာဟာ နိုင်ငံရေးသမားနဲ့ သာမန်လူပြိန်းတွေ အသံတိတ်နှုတ်ဆိတ်နေတာနဲ့တော့ ဟန်ပန် ပုံစံချင်း ဆင်မှာ မဟုတ်ဘူး ကိုယ့်လူ။
             ကိုယ်က မလိုအပ်ဘူးယူဆရင် အသက်ကိုတောင် ခပ်ပြင်းပြင်း ရှူမသွင်းတဲ့သူ။
             I am a free thinker. I am free from thinking.
             ဦးနှောက်နဲ့ နှလုံးသား လွတ်လပ်ပေါ့ပါး ကြည်လင်နေစေဖို့ လူ့အဖြစ်မှာ ကိုယ် ဆန့်ကျင်ငြင်းဆန်နိုင်သမျှ အရာအားလုံးကို ဆန့်ကျင်ငြင်းဆန် ပစ်ခဲ့တယ်။ ဘယ် အယူအဆနဲ့ အမှန်တရားမဆို ခြွင်းချက်တော့ ရှိစမြဲ မဟုတ်လား။ လူ့အဖြစ်မှာ ဆန့်ကျင်ငြင်းဆန်ဖို့ ကိုယ် ဘယ်တော့မှ မစဉ်းစားတဲ့ အရာက ချစ်ခြင်းမေတ္တာ။
             လူ့ဘ၀မှာ အကြိုက်ဆုံး အရာ ၃ ခု ရှိတယ်။
             ကော်ဖီ၊ မိန်းမနဲ့ အနုပညာ။
             အတွေးအခေါ် ကြည်လင်ပြတ်သားချင်ရင် ဦးနှောက်အလုပ်လုပ်ဖို့ အပျင်းမထူနဲ့။
             ချစ်ခြင်းမေတ္တာနဲ့ ဥာဏ်ပညာကို အယုံအကြည်မရှိဘဲ ကိုယ့်ကိုယ်ကိုယ် အတွေးအခေါ်သမားလို့ ထင်နေရင် အာရုံမှောက်မှားနေတာပဲ ဖြစ်လိမ့်မယ်။ အဆိုးမြင်မျက်မှန်နဲ့ လူ့အဖြစ်ကို ကြည့်မိတဲ့ အသက်အရွယ်တုန်းကတော့ ကိုယ်လည်း suicide လုပ်ဖို့ အကြိမ်ကြိမ် စိတ်ကူးယဉ်ခဲ့ဖူးတာပေါ့။ တကယ်တော့ လူ့ဘ၀ဆိုတာ ဘာမှမဟုတ်ပါဘူးကွာ။ ကိုယ့် အသက်၁၆ နှစ်အရွယ်မှာ ဖေဖေ ပြောခဲ့ဖူးတဲ့ စကား။
             ချစ်ခြင်းမေတ္တာ ရှိတဲ့ မိန်းမတစ်ယောက်နဲ့ လိင်ဆက်ဆံရတဲ့ အရသာကို ကိုယ် သိပ်ကြိုက်တယ်။
             ကမ္ဘာပေါ်မှာ ရှိတဲ့ အဆိုအမိန့်မှန်သမျှ ဘာတစ်ခုမှ မကြိုက်ဘူး။ စာအုပ်စာတမ်းတွေဖတ်ပြီး အယူအဆတွေကို အလွတ်ပြန်ရွတ်ပြနေတဲ့ သာလိကာတွေမှာ ကိုယ်ပိုင် အသိဥာဏ် မရှိပါဘူးကွာ။ သဒ္ဒါလည်း မမှန်၊ စကားလုံး အထားအသိုလည်း လွဲချော်၊ အနက်အဓိပ္ပာယ်လည်း မှားယွင်းနေတဲ့ အမှန်တရားအကြောင်း ကိုယ့်ရှေ့မှာ ခဏခဏ လာမပြောနဲ့။ ရှုပ်ထွေးတွန့်လိမ်နေတဲ့ အတွေးအခေါ်တွေကို ခေါင်းထဲမှာ ထည့်ထားမယ့်အစား မီးရှို့ဖျက်ဆီးပစ်လိုက်တာ ပိုကောင်းတယ်။ ကိုယ့်အတွေးအခေါ်ကိုယ် မီးရှို့လို့ CFCs ( Chlorofluorocarbons) တွေ ထွက်လာရင်တော့ ပြသနာပဲ။

                                              ###

              ကိုယ်က ဘုရားသခင်ကိုတောင် ဂရုစိုက်တာ မဟုတ်ဘူး စေတန်။
              လူ့အဖြစ်မှာ ထိခိုက်ရှနာတွေ များလွန်းလို့ သွေးမထွက်တော့တဲ့ ဒဏ်ရာဟာ ကိုယ်ပေါ့။
              ကိုယ့်မှာ မိန်းမမာယာ မြင်ရင် သွေးလန့်တတ်တဲ့ ရောဂါ ရှိတယ်။
              "  ရှင့် အတွေးအခေါ်တွေက ပြင်းထန်ပြီး အစွန်းရောက်လွန်းတယ် "
              "  ကိုယ့် အနမ်းတွေကရော "
              "  ရှင့် အနမ်းတွေကလည်း ရှင့် အတွေးအခေါ်နဲ့ တစ်ထေရာတည်းပဲလေ "
              အသက်ရှင်ခြင်းဟာ သေခြင်းထက် ပိုကောင်းတယ်လို့ အသက်သေလုနီးပါး ဝေဒနာ ခံစားရတဲ့ အခိုက်အတန့်မှာ ကိုယ် သိခဲ့တယ်။ အနုပညာမှာ စိတ်ကျရောဂါလက္ခဏာပြနေတဲ့ စကားလုံးတွေ ထပ်တလဲလဲ မသုံးစွဲမိဖို့ သတိထားနေရတယ်။ ပန့်ခ် ဖက်ရှင်နဲ့ ဆံပင်ကို ဂျယ်လ်နဲ့ထောင်၊ စိတ်ထဲမှာ ဗိုင်းရပ်စ်ကိုက်နေတာ မှားယွင်းလွဲချော်မှု တစ်မျိုးပဲ။
              ကိုယ်သာ တရားသူကြီးတစ်ယောက် ဖြစ်မယ်ဆိုရင် အတွေးအခေါ်သေကြောင်းကြံစည်မှုကို ကိုယ့်ကိုယ်ကိုယ် သေကြောင်းကြံစည်မှုထက် ကြီးလေးတဲ့ အပြစ်ဒဏ်ပေးမယ်။ သူတစ်ပါး နောက်ကျောကို ကုတ်ခြစ်ဖို့ ဟန်ပြင်နေတဲ့ လက်သည်းဝှက်တွေကို ပြန်ရုပ်သိမ်းလိုက်။ ကမ္ဘာပေါ်မှာ ရှက်စရာ အကောင်းဆုံး ပြစ်မှုဟာ လူမှုရေးလုပ်ကြံသတ်ဖြတ်မှု ဖြစ်တယ်။
              " ဒါနဲ့ ခင်ဗျား လုပ်ရမှာ အပျင်းဆုံးအလုပ်က ဘာလဲ "
              " အသိဥာဏ် မရှိတဲ့ လူတွေနဲ့ အငြင်းအခုံ လုပ်ရတာ "
              " စိတ် အပျက်ဆုံး အလုပ်ကရော "
              " ကိုယ့်ကိုယ်ကိုယ် ဥာဏ်ပညာ ရှိတယ်လို့ ထင်နေတဲ့ လူတွေနဲ့ စကားပြောရတာ "
              " အကြိုက်ဆုံး အလုပ်ကရော "
              " ကိုယ်ကလည်း ချစ်ခြင်းမေတ္တာ ရှိပြီး ကိုယ့်အပေါ်လည်း ချစ်ခြင်းမေတ္တာရှိတဲ့ မိန်းမတစ်ယောက်နဲ့ လိင်ဆက်ဆံရတာ "

              အသက် ၂၀ နဲ့ ၂၇ ကြားမှာဘာသာရေးနဲ့ အတွေးအခေါ်တွေကိုလက်လှမ်းမီသမျှ စူးစမ်းလေ့လာဆန်းစစ်ရင်းနဲ့ကိုယ့်ကိုယ်ကိုယ် မေးခွန်းတစ်ခု ပြန်မေးဖြစ်ခဲ့တယ်။
 လူသားတစ်ယောက်အနေနဲ့ ဘယ် ဘုရားသခင်/ နတ်/ ဘုရား ကိုမှအသိအမြင်နဲ့ စိတ်ပိုင်းဆိုင်ရာ ကိုးကွယ်ဆည်းကပ်မှု မပြုဘဲလွတ်လွတ်လပ်လပ်အသက်ရှင်နေထိုင်သွားလို့ မရဘူးလား။ ကမ္ဘာပေါ်မှာ ရှိသမျှ ဘာသာရေး/ ဘာသာဝင်နဲ့ အတွေးအခေါ်/ ၀ါဒီတွေရဲ့ လွတ်လပ်ကွဲပြားစွာ ဖြစ်တည်နေမှုအားလုံးကို အသိအမှတ်ပြု နားလည်ပေးနိုင်ပါတယ်။ ဒါပေမဲ့ ကိုယ့်ရဲ့ တစ်သီးပုဂလလူသားတန်ဖိုးနဲ့ စိတ်ပိုင်းဆိုင်ရာ လွတ်လပ်ခွင့်ကို အထိအခိုက်မခံနိုင်လို့ ဘာသာရေးတစ်ခုခုရဲ့ ဘာသာဝင်အဖြစ်နဲ့ အတွေးအခေါ်ဝါဒ တစ်ခုခုစွဲလမ်းဆုပ်ကိုင်ထားသူ အဖြစ်ကို ဆန့်ကျင်ငြင်းဆန်ခဲ့တယ်။
                ကိုယ်က သစ်ပင်နဲ့ ကလေးငယ်လေးတွေကို ချစ်တတ်သလို အနုပညာ၊ ဥာဏ်ပညာနဲ့ ဆန့်ကျင်ဘက်လိင်ကိုလည်း ချစ်တတ်တယ်။ ဒါပေမဲ့ မိန်းမနှစ်ယောက်ကို တစ်ပြိုင်တည်း မချစ်တတ်သလို ကိုယ် မချစ်တဲ့ မိန်းမတစ်ယောက်နဲ့လည်း ညအတူအိပ်လေ့ မရှိ။ လူ့အဖြစ်ရဲ့ နောက်ဆုံးကာလကို ကိုယ်က " ချစ်ခြင်းမေတ္တာ " လို့ nickname ပေးထားတဲ့ မိန်းကလေး လက်ထဲမှာ အဆုံးသတ်မယ်လို့ တွေးထားတယ်။ သူ့ ရင်ညွန့်မှာ မှဲ့နက်လေး တစ်လုံးနဲ့။
                " မင်း ရင်သားတွေဆီမှာ မျက်နှာအပ်ပြီး ကလေးတစ်ယောက်လို အိပ်ချင်တယ် "
                "  ရှင် သေဆုံးမယ့် အချိန်အထိ ရှင့်အနားမှာ ကျွန်မကို ရှိနေစေချင်ရင် ရှိနေပေးပါ့မယ် "
                ချစ်ခြင်းမေတ္တာဆိုတာ တွေးခေါ်မြော်မြင်ဖို့ မဟုတ်၊ အာရုံတွေ့ကြုံခံစားဖို့ပဲလို့ ကိုယ် ပြောခဲ့တယ်။
                သာမန်လူပြိန်းဆိုတာ ချစ်ခြင်းမေတ္တာ၊ ဥာဏ်ပညာနဲ့ အဆင့်မြင့်အနုပညာတွေကို စိတ်မ၀င်စား၊ ငွေကြေး ဂုဏ်ဒြပ်နဲ့ ရုပ်ဝတ္ထုပစ္စည်းတွေရဲ့ ကျေးကျွန်ဖြစ်နေသူတွေကို ကိုယ် ခေါ်လေ့ရှိတဲ့ နာမည်။
                " မြို့လယ်ကောင် လမ်းမတွေမှာ လူတွေ ရုန်းဆန်ခတ်နဲ့။ ကိုယ့် အသက်အန္တရာယ် ကိုယ် ကာကွယ်ဖို့ လုံခြုံတဲ့ တစ်နေရာရာ အပြေးအလွှား ရှာဖွေနေရချိန်။ ပြင်သစ်စတိုင်လ် ကော်ဖီဆိုင်ထဲ MP4 ကိုယ်စီနဲ့ ကော်ဖီသောက် မပျက်တဲ့ လူငယ်စုံတွဲကိုရော ခင်ဗျား ဘယ်လို နာမည် ပေးမလဲ "
                "အမှန်တရား ပျောက်ဆုံးနေတဲ့  အမှောင်ခေတ်က ထုတ်လုပ်ပေးလိုက်တဲ့ ဘေးထွက်ပစ္စည်းတွေ "


                                              ###

                လူ့ဘ၀မှာ လှပစွာ နေသွားတတ်အောင် သင်ကြားဆည်းပူးပါ။ အကယ်ရွေ့ ဖြစ်နိုင်ပါက ဘ၀ကို လှပအောင် လုပ်ပါ။ အကယ်ရွေ့ မဖြစ်နိုင်ဘူးဆိုရင်တောင် ဘ၀ကို ရုပ်ဆိုးသွားအောင် မလုပ်ပါနှင့်တဲ့။ အိန္ဒိယစာရေးဆရာကျိတ္တိရပ္ပ္ပ္ပ္ပ
ါဝေရဲ့ " စိတြပိယာ " ၀တ္ထုထဲမှာ ဇာတ်ကောင်တစ်ကောင် ပြောခဲ့ဖူးတဲ့ စကား။
                အသက် ၃၆ နှစ်အရွယ်အထိ လူ့ဘ၀ရဲ့ အဓိပ္ပာယ်ဟာ ဘာလဲလို့ ကိုယ် ရှာဖွေမောပန်းခဲ့တယ်။ အဓိပ္ဗ္ပာယ် မရှိဘူးဆိုတာ သိလျက်နဲ့ " မရှိခြင်း " ကို ရှာဖွေရင်း ဘ၀အဓိပ္ပာယ် ပျောက်ဆုံးခဲ့ရတဲ့ အမှောင်နှစ်ကာလတွေပေါ့။ အခု ကိုယ်ဟာ အမှောင်နှစ်တွေကို ဖြတ်ကျော်လွန်မြောက်လာတဲ့ အလင်း အစိုင်အခဲ။ ကိုယ့် နှလုံးသားမှာ ချစ်ခြင်းမေတ္တာ ၊ ကိုယ့် ဦးနှောက်မှာ ဥာဏ်ပညာ အသားတံဆိပ်နဲ့။
                အမည် အောင်ရင်ငြိမ်း၊ နိုင်ငံသားစိစစ်ရေး ကတ်ပြားအမှတ် ၇/ရတန(နိုင်) ၀၆၅၃၂၂၊ မွေးသက္ကရာဇ် ၁၇-၆-၁၉၇၃၊ အလုပ်အကိုင် ကဗျာဆရာ၊ ကိုးကွယ်သည့်ဘာသာ free thinker ၊ တရားဝင် ချစ်သူအမည် - မရှိ ၊ ထင်ရှားသည့်အမှတ်အသား ဘာမှ မသိနားမလည်တဲ့ ကလေးတစ်ယောက်လို မျက်လုံးများ ရှိ၊ ရောဂါ နောက်ကြောင်းရာဇ၀င် စိတ်ကျရောဂါနှင့် အဆိုးမြင် သံသယ၀ါဒီ၊ နိုင်ငံရေး ယုံကြည်ချက် လစ်ဘရယ်ဒီမိုကရေစီ၊ အကြိုက်ဆုံး သိပ္ပံသီဝရီ ခေးအော့စ်၊ အကြိုက်ဆုံး အဆိုအမိန့် မရှိ၊ လက်စွဲဆောင်ပုဒ် ၊တစ်ခုခု တည်ဆောက်၊ပြီးတော့ ပြန်ဖြိုဖျက်။
                " ခင်ဗျားက Deconstructionist တစ်ယောက်ပဲ။ ဒါမှ မဟုတ် Nihilist လား။  Freethinker လား "
                " ကိုယ် မကြာခဏပြောလေ့ရှိတဲ့ စကားလုံးတွေက မင်းရဲ့ အမြင်ကို သြဇာလွှမ်းမိုးနေပုံ ရတယ်။ စကားလုံးတွေကို ခဏ ဖယ်ထားလိုက်ပါ။ လူတစ်ယောက်ကို လူတစ်ယောက်လို့ပဲ မြင်တာ အကောင်းဆုံး ဖြစ်လိမ့်မယ် "
                လူတွေဟာ စကားလုံးတွေကို ပညတ်သင်္ကေတ စကားလုံးတွေအဖြစ် ရိုးရိုးရှင်းရှင်း မမြင်ဘဲ အနက်အဓိပ္ပာယ်တွေ၊ နိမိတ်ပုံတင်စားမှုတွေ၊ ရည်ညွှန်းချက်တွေနဲ့ ရောနှောမြင်လေ့ ရှိကြတယ်။
                လူတစ်ယောက်မှာ ရှိသင့်တဲ့ လူမှုဆက်ဆံရေး ကိုယ်ကျင့်တရားနဲ့ လူတွေအပေါ်ထားသင့်တဲ့ စိတ်နေသဘောထားအမှန်တွေကို သင့်ရင်သွေး မူကြိုကျောင်းသားဘ၀အရွယ်မှာ အပြီးသင်ကြားပေးလိုက်ပါ။ အသက် (၁၈) နှစ်ပြည့်ပြီးလို့မှ ကိုယ်ချင်းစာတရားနဲ့ လူသားချင်းစာနာစိတ်ကို နားမလည်သေးဘူးဆိုရင် အဲဒီ လူ့အန္ဓ အဲဒီ လူ့ငနဲကို ခင်ဗျား ဘာမှ မျှော်လင့်မနေနဲ့တော့။ ဒီခေတ်ထဲမှာ လူမှုဝန်းကျင်က ပုံသွင်းထုတ်လုပ်ပေးလိုက်တဲ့ ဘေးထွက်ပစ္စည်းတွေ အရမ်းပေါ။ လူမှုရေး အတင်းအဖျင်းပြောပြီး လျှာအရသာခံ/ စိတ်ပိုင်းဆိုင်ရာနှစ်သိမ့်ကျေနပ်မှု ရယူတတ်တဲ့သူတိုင်းမှာ ကိုယ်ပိုင်စိတ်ရောဂါကုဆရာဝန်တစ်ယောက်စီ ရှိသင့်တယ်။
                 ဥပမာ- သူတစ်ပါးရဲ့ လူမှုရေးကိစ္စတွေမှာ ပါဝင်စွက်ဖက်မှု၊ မနာလိုဝန်တိုမှုနဲ့ ပုဂိုလ်ရေးအတင်းအဖျင်းပြောခြင်းဟာ အောက်တန်းကျတဲ့ ရှက်စရာ အပြုအမူဖြစ်တယ် ဆိုတာ အသက် (၆၀) အရွယ်အထိ မသိနားမလည်သေးတဲ့ လူကြီးလူကောင်းတစ်ယောက်။
                " ရှင် ဘယ်လောက်ပဲ အကောင်းမြင်စိတ် မွေးနေပါပြီ ပြောပြော လူတွေနဲ့ ပတ်သက်ပြီး ရှင့်ဆီမှာ အဆိုးမြင်စိတ်တွေ ရှိနေတုန်းပါပဲ။ လူအများစုဟာ စိတ်ယဉ်ကျေးမှု နိမ့်ကျပြီး လူပြိန်းသာသာတွေပဲ ဖြစ်တယ်။ လူတွေမှာ စိတ်ပျက်စရာ လူမှုအလေ့အကျင့်တွေပဲ ရှိတယ်လို့ ရှင် ဆိုလိုချင်နေတာ မဟုတ်လား "
                " အိုးးးးး နိုးးး လူတွေက စိတ်ပျက်စရာ မဟုတ်ပါဘူး။ ကိုယ့် အမြင်မှာ လူတွေက ရယ်စရာ ဟာသတွေပါ "
                ဒီကမ္ဘာလောကမှာ ရယ်စရာအကောင်းဆုံးပြက်လုံးနဲ့တူတဲ့ လူတွေရဲ့ အမူအကျင့်တွေကို စာရင်းပြုစုထားတာ ရှိတယ်။
                ၁။ ဦးခေါင်းထဲမှာ ငွေကြေးနဲ့ ကိုယ်ကျိုးစီးပွားကလွဲပြီး ဘာမှ မရှိတဲ့သူ
                ၂။ ကိုယ့်ကိုယ်ကိုယ် ဥာဏ်ပညာ ရှိတယ်လို့ ထင်မြင်နေတဲ့ သူ
                ၃။ စာအုပ်စာတမ်းတွေထဲက ရတဲ့ အသိကို ဥာဏ်ပညာလို့ ထင်မြင်ယူဆခြင်း
                ၄။ ငါ အမှန်ဝါဒီများ
                ၅။ ရုပ်ဝတ္ထုပစ္စည်းနဲ့ ဂုဏ်ဒြပ်တွေဆီမှာ စိတ်ကျေနပ်သာယာတတ်သူများ
                ၆။ အတ္တဗဟိုပြုတွေးခေါ်ခြင်း
                ၇။ ယောက်ျားဖြစ်ပြီး မိန်းမဆန်သော စရိုက်သဘာဝ ရှိသူ
                ၈။ ဘာသာရေးနဲ့ အတွေးအခေါ် အယူအဆများဆီမှာ ဆင်ခြင်တုံတရား နစ်ဝင်ပိတ်လှောင်နေသူ
                ၉။ Modern Conservatives
              ၁၀။ ကိုယ် ကိုယ်တိုင်

                                              ###


                 " ရှင့်ကိုယ်ရှင် ရယ်စရာပြက်လုံးတစ်ခုလို့ တကယ် ယူဆထားတာလား "
                 " ဒီနေ့ခေတ်က လူတစ်ယောက်ရဲ့ မမြင်ကွယ်ရာမှာ သူ့အားနည်းချက်ကို ဟားတိုက်ရယ်မောကြတဲ့ ယဉ်ကျေးမှု ထွန်းကားတဲ့ ခေတ်ကြီးပဲ။ ကိုယ့်ကိုယ်ကိုယ် ရယ်စရာလို့ ယူဆမထားရင် တခြားသူတွေက ရယ်စရာလို့ ယူဆကြလိမ့်မယ် "
                 " ဒါနဲ့ တချို့လူတွေ ယောက်ျားဖြစ်ပြီး မိန်းမဆန်တဲ့ အမူအကျင့်တွေ ရှိနေတာကရော ဘာကြောင့်လို့ ရှင်ထင်သလဲ "
                 " သူတို့ အသွေးအသားထဲမှာ ကျားဟိုမုန်းထက် မိန်းမဟိုမုန်းဓာတ်တွေ လွန်ကဲနေလို့ ဖြစ်မှာပေါ့ "
                 ဒီကမ္ဘာလောကမှာ အပြစ်အနာအဆာကင်းတဲ့ လူမှုအမှန်တရားဆိုတာ မရှိဘူး။ အမှန်တရားတိုင်းမှာ ဘလိတ်ဓားနဲ့ခြစ်လိုက်ရင် အစင်းရာထင် သွေးစို့သွားနိုင်တဲ့ အားနည်းချက် ကိုယ်စီနဲ့။ လူတစ်ယောက်က အမှန်တရားလို့ စွဲလမ်းဆုပ်ကိုင်ထားတဲ့ အရာဟာ တခြားလူတစ်ယောက်အမြင်မှာ အမှားဖြစ်နေနိုင်တယ်။
                 အမှန်တရားဆိုတာ အခန့်မသင့်ရင် ပေါက်ပြဲသွားနိုင်တဲ့ ကွန်ဒုံးတစ်မျိုးပါကွာ။
                 လူမှုဆက်ဆံရေးဈေးကွက်ထဲမှာ အမှန်တရားမျိုးစုံဟာ အမှတ်တံဆိပ်မျိုးစုံနဲ့။
                 အမှန်တရားဟာ မယုံကြည်ရဘူး။ ဘယ်အမှန်တရားက အစစ်အမှန်လဲ မသေချာဘူး။ ခင်ဗျားရဲ့ အမှန်တရားကို နေ့စဉ်ပုံမှန်စမ်းသပ်စစ်ဆေးဖို့ မမေ့နဲ့။ စိတ်အပြောင်းအလဲများတဲ့ မိန်းမတစ်ယောက်ရဲ့ မာယာလိုပဲ။ အမှန်တရားဟာ အသွင်ပုံစံမျိုးစုံနဲ့ အရိပ်အရောင်မျိုးစုံနဲ့ အချိန်နဲ့အမျှ ပြောင်းလဲနေတယ်။
                 မနေ့က အမှန်တရားဟာ ဒီနေ့ အဟောင်းပစ္စည်းဈေးကွက်ထဲမှာ 50% Discount နဲ့။
                 ကိုယ်ကိုယ်ကိုယ် အမှန်တရားလို့ အမြဲထင်မြင်ယူဆနေရင် " အတ္တတန်ဖိုးစံနှုန်းများ ပြောင်းလဲခြင်းသီဝရီ " ကို ခင်ဗျား မသိနားမလည်သေးလို့ပဲ။
                 ကိုယ့်နဖူးမှာ လူမှုအမှန်တရားကို မယုံကြည်ဘူးဆိုတဲ့ ပလာစတာတစ်ခုနဲ့။
                 ဗုဒ္ဓ/ ဘုရားသခင်/အလ္လာ တစ်စုံတစ်ယောက်ကို ကိုးကွယ်ဆည်းကပ်ပါတယ် ပြောပြီး အပြစ်မကင်း မရိုးမဖြောင့် အသက်ရှင်နေတာထက်စာရင် ကိုယ့်ကိုယ်ကိုယ် ဘုရားသခင်လို့ သတ်မှတ်ပြီး မကောင်းမှုတွေ ရှောင်ကြဉ်ရတာက ပို အပြစ်ကင်းပါလိမ့်မယ်။ ကုသိုလ်ကောင်းမှုတွေချည်းပဲ နေ့စဉ်လုပ်နေရရင်လည်း လူ့ဘ၀ရဲ့ ခါးစိမ့်တဲ့အရသာကို ဘယ်ရနိုင်တော့မလဲ။ လူ့အဖြစ်မှာ ကောင်းမှုတွေလုပ်ရတာ ပျင်းရိငြီးငွေ့လာတဲ့ အခါ အပြောင်းအလဲ အသစ်အဆန်းလေး ဖြစ်အောင် တစ်ခါတလေ ပေါ့ပါးလွတ်လပ်တဲ့ မကောင်းမှုလေးတွေ ကျူးလွန်ကြတာပေါ့ကွာ။
                 ပုထုဇဉ်ဘုရားသခင်ဟာ အသွေးနဲ့ အသားနဲ့။
                 " မင်းရဲ့ ရင်သားတွေကို ကိုယ် သိပ်ကြိုက်တယ် "
                 " မင်း ရင်သားတွေဆီမှာ မျက်နှာအပ်ပြီး ကလေးတစ်ယောက်လို အိပ်ချင်တယ် "
                 " ကိုယ့် ဘ၀ရဲ့ နောက်ဆုံးအချိန်တွေမှာကိုယ်ကလည်း ချစ်ခြင်းမေတ္တာ ရှိပြီး ကိုယ့်ကိုလည်း ချစ်ခြင်းမေတ္တာ ရှိတဲ့ မိန်းမတစ်ယောက်ရဲ့ လက်ထဲမှာပဲအသက်သေဆုံးသွားချင်တယ် "

                 ###

                 အချိန်ကာလ ယန္တရားကြီးထဲမှာ လောကမှာ ရှိသမျှအရာအားလုံး ဖြစ်ပျက်ပြောင်းလဲနေကြတယ်။ ချစ်ခြင်းမေတ္တာဆိုတာ အမြဲ အသစ်ပြန်လည်မွေးဖွားနိုင်တဲ့ မျိုးပွားဆဲလ်တစ်မျိုးပဲ။ အဲဒါကို ယုံကြည်ဖို့ပဲ လိုတယ်။ နှလုံးသား အမြဲရှင်သန်သက်ဝင်နေချင်ရင် ခရစ်ယာန်တစ်ယောက် ဘုရားသခင်ကို ယုံကြည်သလို ချစ်ခြင်းမေတ္တာကို ခင်ဗျား ယုံကြည်ဖို့လိုတယ်။
                 " ကလေးငယ်တွေ ချစ်ခြင်းမေတ္တာ လိုအပ်နေကြတယ် "
                 " ဆင်းရဲမွဲတေသူတွေ အစာရေစာနဲ့ ဘ၀လုံခြုံမှု လိုအပ်နေကြတယ် "
                 " အသိဥာဏ်နိမ့်ကျသူတွေ ဥာဏ်ပညာ လိုအပ်နေကြတယ် "
                 " လူ့အဖွဲ့အစည်းဟာ သွေးသစ်လဲဖို့ လိုအပ်နေတယ် "
                 " စစ်ပွဲ ဒဏ်သင့် ပြည်သူတွေ ငြိမ်းချမ်းရေး လိုအပ်နေကြတယ် "
                 " ကမ္ဘာမြေကြီးကတော့ သစ်ပင်တွေကို အရေးပေါ် လိုအပ်နေတာပေါ့ "
                 ငွေကြေးနဲ့ ကိုယ်ကျိုးစီးပွားအတွက် အဓိက မောင်းနှင်လည်ပတ်နေတဲ့ ခင်ဗျားရဲ့ အင်ဂျင်ကို ခဏရပ်တန့်ပြီး ကမ္ဘာမြေအတွက် သစ်ပင်တစ်ပင်လောက်စိုက်ဖို့ စိတ်ကူးဖူးသလား။ ဒါမှမဟုတ် ခင်ဗျားရဲ့ တန်ဖိုးကြီးမျက်မှန်ကို ခဏချွတ်ပြီး လူမှုအဆင့်အတန်း နိမ့်ကျသူတွေဆီ ကိုယ်ချင်းစာတရားနဲ့ လှည့်ကြည့်ဖို့ စဉ်းစားဖူးသလား။
                 လူ့အဖွဲ့အစည်း သွေးသစ်လဲဖို့ လိုအပ်နေတာ နှစ်ပေါင်း နှစ်ဆယ်။
                 ကိုယ့် ရင်သွေးကို ချစ်ခြင်းမေတ္တာထားသလို တခြားကလေးသူငယ်တွေကိုလည်း မေတ္တာထားပါ။ အပြစ်ကင်းစင်ပြီး ဘာမှ မသိနားမလည်သေးတဲ့ ကလေးငယ်ကို ခင်ဗျားရဲ့ ရှုပ်ထွေးပွေလီလှတဲ့ ကိုယ့်ကိုယ်ကိုယ် ခုခံကာကွယ်မှု ယန္တရားကြီးအကြောင်း သင်ပေးဖို့ စဉ်းစားနေသလား။ နှလုံးသွင်းမှန်ကန်တဲ့ လူမှုအလေ့အကျင့်တွေကိုသာ ကလေးငယ်တွေ သင်ယူပါစေ။ လူ့အဖွဲ့အစည်း သွေးသစ်လဲဖို့ လိုအပ်နေတာ နှစ်ပရိစ္ဆေဒ ကြာလှပေါ့။ ကိုယ်ကျိုးစီးပွားအမြင်နဲ့ တစ်ကိုယ်ကောင်းဝါဒကို အမွေပေးလိုက်ရင် ခင်ဗျားရင်သွေးတွေရဲ့ မျိုးဆက်မှာ ခေတ်ဟာ ပိုမို မှောင်မိုက်သွားလိမ့်မယ်။
                 " စာအုပ်စာတမ်းတွေ ဖတ်ရဲ့သားနဲ့ အသိဥာဏ်နဲ့ ကိုယ်ရည်ကိုယ်သွေး ဖွံ့ဖြိုးတိုးတက်မလာတဲ့ လူတွေကို ရှင် ဘယ်လို မြင်သလဲ "
                 " ပင်ကိုဗီဇ မကောင်းတဲ့ အပြင် ဆင်ခြင်တုံတရား အားနည်းနေသူတွေလို့ မြင်တယ်။ သူတို့ စာဖတ်လည်း အလကားပါပဲ "
                 " ခင်ဗျား ငယ်ငယ်တုန်းက Existentialism စာပေတွေ ဖတ်ခဲ့ဖူးတယ်ဆို။ Existentialism ကနေ ဘာတွေ ရခဲ့လဲ "
                 " ဒီမိုကရေစီ ရခဲ့တယ် "
                 " Existentialism နဲ့ ဒီမိုကရေစီ ဘာဆိုင်လို့လဲ "
                 " လူတစ်ဦးချင်း လွတ်လပ်စွာ ရွေးချယ်ဆုံးဖြတ်ပိုင်ခွင့် ၊ ကိုယ့် ရွေးချယ်ဆုံးဖြတ်ချက်အပေါ် တာဝန်ယူမှု၊ တစ်သီးပုဂလသဘောနဲ့ ကိုယ်ချင်းစာတရား "
                 " ကျွန်မ သိသလောက် Existentialism ထဲမှာ ကိုယ်ချင်းစာတရားအကြောင်း မပါပါဘူးရှင် "
                 " တစ်သီးပုဂလသဘောကနေ ကိုယ်ချင်းစာတရားဆီ ရောက်အောင် ဆက်စပ်မတွေးခေါ်တတ်တာ မင်းရဲ့ ဆင်ခြင်ဥာဏ် အားနည်းညံ့ဖျင်းမှုပဲ ဖြစ်လိမ့်မယ် "
                 " လူသားတိုင်းဟာ ကိုယ်ပိုင်သွေးသားဖွဲ့စည်းမှုတွေ၊ စိတ်ပိုင်းဆိုင်ရာ အာရုံခံစားမှုတွေ၊ အသိအမြင်တွေနဲ့ သီးခြားစီ ဖြစ်တည်နေတဲ့ ပုဂ္ဂလိကလူသားတွေပဲ။ လူတစ်ယောက်ချင်းစီရဲ့ ပုဂ္ဂလိကဖြစ်တည်မှုနဲ့ တခြားလူတစ်ယောက်ရဲ့ ဖြစ်တည်မှုဟာ လုံးဝမတူကွဲပြားခြားနားနေနိုင်တယ်။ ဒါပေမဲ့ ပုဂ္ဂလိကလူသားတစ်ယောက်ဖြစ်တဲ့ မင်းအနေနဲ့ လူ့အဖြစ်မှာ ကိုယ်ရောစိတ်ပါ ကျန်းမာပျော်ရွှင်ချင်တယ်။ ဘ၀အာမခံချက်နဲပ စိတ်ပိုင်းဆိုင်ရာ လုံခြုံမှု လိုချင်တယ်။ လူမှုဝန်းကျင်ရဲ့ အသိအမှတ်ပြုမှုနဲ့ အောင်မြင်ကျော်ကြားမှုကို လိုချင်တယ်။ မင်းမဟုတ်တဲ့ တခြားလူတစ်ယောက်ဟာလည်း မင်းလို ပုဂ္ဂလိက လူသားတစ်ယောက်ပဲလေ။ အဲဒီလူမှာလည်း မင်းလို လိုအင်ဆန္ဒတွေနဲ့ အာရုံခံစားမှုတွေ ရှိနေနိုင်တယ်။ မင်းနဲ့ တခြား လူတစ်ယောက်ဟာ ပုဂ္ဂလိက ဖြစ်တည်မှုနဲ့ အနှစ်သာရချင်း ကွဲပြားခြားနားနေပေမယ့် ပုဂ္ဂလိက ဖြစ်တည်နေတဲ့ သဘောသဘာဝချင်း အတူတူပဲ။ အဲဒီလို လူသားတစ်ယောက်အပေါ် မင်းနဲ့ မင်းရဲ့ ဆွေမျိုးသားချင်း အသိုင်းအ၀ိုင်းတွေနဲ့ ထပ်တူထပ်မျှ သဘောထားပြီး ကိုယ်ချင်းစာစိတ် ထားနိုင်ရင် ကိုယ်တို့ လူ့အဖွဲ့အစည်းနဲ့ ကမ္ဘာကြီး ပိုပြီး သာယာလှပမလာနိုင်ဘူးလာ။။ ဒါနဲ့ အဲဒီလိုရော ကိုယ့်အတ္တကို ဖယ်ရှားပြီး တစ်သက်မှာတစ်ခါလောက်မှ မင်း စဉ်းစားဖူးရဲ့လား "
                  " တော်ပြီကွာ...အသိဥာဏ်မရှိသူတွေနဲ့ အငြင်းအခုံလုပ်ဖို့ ကိုယ်ဝါသနာမပါဘူး ဆိုတာ မင်း သိပါတယ် "
                  " ရှင်က ကိုယ့်ကိုယ်ကိုယ် အသိဥာဏ် ရှိတယ်လို့ ထင်နေပုံ ရတယ် "
                  " အိုးးးး နိုးးးး မဟုတ်ပါဘူး။ ကိုယ်က ကလေးတစ်ယောက်လို ဘာမှ မသိနားမလည်တဲ့ မျက်လုံးမျိုးတွေ ရှိတဲ့ သူပါ "

                                                     ###

                  ကိုယ်ဟာ လွတ်လပ်တဲ့ တွေးခေါ်သူ တစ်ယောက်။
                  ကိုယ်ဟာ တွေးခေါ်ဆင်ခြင်မှုကနေ လွတ်ကင်းနေတယ်။
                  ဦးနှောက်နဲ့ နှလုံးသား လွတ်လပ်ပေါ့ပါ့း ကြည်လင်နေစေဖို့ လူ့အဖြစ်မှာ ဆန့်ကျင်ငြင်းဆန်နိုင်သမျှ အရာအားလုံးကို ဆန့်ကျင်ငြင်းဆန်ပစ်ခဲ့တယ်။ ကိုယ်က ဘုရားသခင်ကိုတောင် ဂရုစိုက်တာ မဟုတ်ဘူး စေတန်။
                  ကိုယ့်ဘ၀မှာ ကိုယ်က ဘုရားသခင်ပဲ။
                 " မင်းက ငါ့ကိုတောင် ဂရုမစိုက်ဘူး ဆိုတော့ ဘယ်သူ့အားကိုး ရှိလို့လဲ "
                 " ကျွန်တော့်ကိုယ် ကျွန်တော်ပဲ အားကိုးပါတယ် "
                 " အဲဒါ ဗုဒ္ဓရဲ့ ဒသနပဲ "
                 " ကော်ပီကူးချထားတာ မဟုတ်ပါဘူးဗျာ။ ကြုံကြိုက်တိုက်ဆိုင်မှုပဲ ဖြစ်မှာပါ။ ဗုဒ္ဓက အဲဒီလို တွေးခေါ်ဖူးတာနဲ့ ကျွန်တော်က အဲဒီလို တွေးခေါ်လို့ မရတော့ဘူးလား "
                 " ငါ့ကို ယုံကြည်ကိုးကွယ်ရင် မင်းကျူးလွန်ခဲ့သမျှ အပြစ်အားလုံး လွတ်ငြိမ်းချမ်းသာခွင့် ရပြီး ထာဝရအသက်ကို ရလိမ့်မယ် "
                 " ပုဂ္ဂိုလ်ရေး ကိုးကွယ်ဆည်းကပ်တာ လူညံ့တွေရဲ့ အလုပ်ပဲ။ ကိုယ့် အဓိပ္ပာယ်နဲ့ ကိုယ် နေစမ်းပါ ဘုရားသခင်ရာ။ အခုလက်ရှိ ရထားတဲ့ လူ့အဖြစ်ကိုတောင် ပျင်းရိငြီးငွေ့နေလွန်းလို့ "
                 ကိုယ့်ကို အကျွတ်တရား ရမယ့် ငနဲ မဟုတ်မှန်း သိမြင်နားလည်သွားတဲ့ ဘုရားသခင်ဟာ " မိစ္ဆာဒိဋ္ဌိ " ဆိုတဲ့ အမနာပတံဆိပ်ကို ကိုယ့်နဖူးပေါ်မှာ ကပ်ပေးလိုက်တယ်။ ပြီးတော့ သူ့ကို ပုဂ္ဂိုလ်ရေး ကိုးကွယ်ဆည်းကပ်မှုပြုမယ့် လူတွေဆီ ကိုယ်ကျိုးစီးပွားမျှော်ဝါဒနဲ့ ဆက်လက်ထွက်ခွာသွားတယ်။
                 ကိုယ့် အယူဝါဒ ကိုယ့်အမှန်တရားကို လက်မခံတာနဲ့ အဲဒီလူတစ်ယောက်ကို " မိစ္ဆာဒိဋ္ဌိ " လို့ အမည်တပ်ခေါ်ဝေါ်တာ လစ်ဘရယ်အတွေးအခေါ် မရှိ၊ သဘောထားအမြင် ကျဉ်းမြောင်းရာကျတဲ့ လက္ခဏာပဲ မဟုတ်လား။
                ကိုယ် ပြောပါတယ်။
                ဘုရားသခင်မှာလည်း မိန်းမဆန်တဲ့ စရိုက်သဘာဝ ရှိတယ်လို့။


                                                                             ###


                                                                                အောင်ရင်ငြိမ်း
                                                                                ၁၅ စက်တင်ဘာ ၂၀၁၁
                                                                                ပေဖူးလွှာ မဂ္ဂဇင်း၊ ဇန်န၀ါရီ၊ ၂၀၁၂